2013-ի Հաղորդակցութեան Համաշխարհային Օր` «Ընկերային Ցանցեր, Ճշմարտութեան Եւ Հաւատքի
Դռներ. Աւետարանի Քարոզչութեան Նոր Տարածքներ»:
Կիրակի, 12 մայիս 2013-ին նշուեցաւ Ընկերային հաղորդամիջոցներու 47-րդ համաշխարհային
օրը, որուն բնաբանն է` «Ընկերային ցանցեր, ճշմարտութեան եւ հաւատքի դռներ. Աւետարանի
քարոզչութեան նոր տարածքներ»: Սրբազան քահանայապետին այս պատգամը լոյս տեսած էր անցեալ
24 յունուար 2013-ին, լրագրողներու պաշտպան Ս. Ֆրանչիսկոս Սալեզացիի տօնին օրը: Այս
առիթով Պէյրութի մէջ տեղի ունեցաւ Ընկերային հաղորդամիջոցներու 47-րդ համաշխարհային օրուան
նուիրուած հանդիսաւոր սուրբ պատարագ` գլխաւորութեամբ մարոնի առաջնորդ Պուլոս Մաթար եպիսկոպոսին
եւ հայ կաթողիկէ պատրիարքարանէն մասնակցեցաւ հայր Վարդան վրդ. Գազանճեան: Նմանապէս
հինգշաբթի, 9 մայիսին տեղի ունեցաւ մամլոյ ասուլիս մը` Հաղորդամիջոցներու կաթողիկէ կեդրոնին
մէջ: Մամլոյ ասուլիսին մասնակցեցաւ տեղեկատուութեան նախարարի պաշտօնակատար Ուալիտ Տաուք: Ընկերային
հաղորդամիջոցները, ներառեալ` ընկերային համացանցերը շինիչ երկխօսութեան առիթներ կ՛ընծայեն,
ամրապնդելով մարդոց միջեւ միութիւնը եւ յառաջացնելով արդիւնաւէտ ներդաշնակութիւնը մարդկային
ընտանիքին մէջ: Այս առիթով, հայ հաղորդամիջոցները հրաւիրուած են նոր եռանդով եւ միասնակամ
զարգացնելու իրենց աշխատելաձեւն ու ներդաշնակ համագործակցութիւնը իրարու միջեւ` լաւապէս
իրագործելու հայապահպանման առաքելութիւնը եւ մարդկային արժէքներուն տարածումը